תְהִלִּיםמ״ט

קריאה כללית לשמוע חכמה

א׳
למנצח לבני קרח מזמור שמעו זאת כל העמים האזינו כל ישבי חלד׃
ב׳
גם בני אדם גם בני איש יחד עשיר ואביון׃
ג׳
פי ידבר חכמות והגות לבי תבונות׃
ד׳
אטה למשל אזני אפתח בכנור חידתי׃

איוולת הביטחון בעושר

ה׳
למה אירא בימי רע עון עקבי יסובני׃
ו׳
הבטחים על חילם וברב עשרם יתהללו׃
ז׳
אח לא פדה יפדה איש לא יתן לאלהים כפרו׃
ח׳
ויקר פדיון נפשם וחדל לעולם׃
ט׳
ויחי עוד לנצח לא יראה השחת׃
י׳
כי יראה חכמים ימותו יחד כסיל ובער יאבדו ועזבו לאחרים חילם׃
י״א
קרבם בתימו לעולם משכנתם לדר ודר קראו בשמותם עלי אדמות׃
י״ב
ואדם ביקר בל ילין נמשל כבהמות נדמו׃

הקבר ממתין לכסיל העשיר

י״ג
זה דרכם כסל למו ואחריהם בפיהם ירצו סלה׃
י״ד
כצאן לשאול שתו מות ירעם וירדו בם ישרים לבקר וצירם לבלות שאול מזבל לו׃
ט״ו
אך אלהים יפדה נפשי מיד שאול כי יקחני סלה׃

אל תקנא בהצלחה הארצית

ט״ז
אל תירא כי יעשר איש כי ירבה כבוד ביתו׃
י״ז
כי לא במותו יקח הכל לא ירד אחריו כבודו׃
י״ח
כי נפשו בחייו יברך ויודך כי תיטיב לך׃
י״ט
תבוא עד דור אבותיו עד נצח לא יראו אור׃
כ׳
אדם ביקר ולא יבין נמשל כבהמות נדמו׃
Use ← → arrow keys to navigate
Settings

Reading Style

Typeface

Font Size 19px

Reading Width 45 chars

Options