תְהִלִּיםקל״ו

קריאה להודות לה׳ העליון

א׳
הודו ליהוה כי טוב כי לעולם חסדו׃
ב׳
הודו לאלהי האלהים כי לעולם חסדו׃
ג׳
הודו לאדני האדנים כי לעולם חסדו׃

נפלאות האל בבריאה

ד׳
לעשה נפלאות גדלות לבדו כי לעולם חסדו׃
ה׳
לעשה השמים בתבונה כי לעולם חסדו׃
ו׳
לרקע הארץ על המים כי לעולם חסדו׃
ז׳
לעשה אורים גדלים כי לעולם חסדו׃
ח׳
את השמש לממשלת ביום כי לעולם חסדו׃
ט׳
את הירח וכוכבים לממשלות בלילה כי לעולם חסדו׃

מעשי האל הגבור ביציאת מצרים

י׳
למכה מצרים בבכוריהם כי לעולם חסדו׃
י״א
ויוצא ישראל מתוכם כי לעולם חסדו׃
י״ב
ביד חזקה ובזרוע נטויה כי לעולם חסדו׃
י״ג
לגזר ים סוף לגזרים כי לעולם חסדו׃
י״ד
והעביר ישראל בתוכו כי לעולם חסדו׃
ט״ו
ונער פרעה וחילו בים סוף כי לעולם חסדו׃

הכנעת מלכים ונתינת הארץ

ט״ז
למוליך עמו במדבר כי לעולם חסדו׃
י״ז
למכה מלכים גדלים כי לעולם חסדו׃
י״ח
ויהרג מלכים אדירים כי לעולם חסדו׃
י״ט
לסיחון מלך האמרי כי לעולם חסדו׃
כ׳
ולעוג מלך הבשן כי לעולם חסדו׃
כ״א
ונתן ארצם לנחלה כי לעולם חסדו׃
כ״ב
נחלה לישראל עבדו כי לעולם חסדו׃

פרנסה לכל וחסד עולם

כ״ג
שבשפלנו זכר לנו כי לעולם חסדו׃
כ״ד
ויפרקנו מצרינו כי לעולם חסדו׃
כ״ה
נתן לחם לכל בשר כי לעולם חסדו׃
כ״ו
הודו לאל השמים כי לעולם חסדו׃
Use ← → arrow keys to navigate
Settings

Reading Style

Typeface

Font Size 19px

Reading Width 45 chars

Options