מִשְׁלֵיג׳

שמור את התורה ותמצא חן

א׳
בני תורתי אל תשכח ומצותי יצר לבך׃
ב׳
כי ארך ימים ושנות חיים ושלום יוסיפו לך׃
ג׳
חסד ואמת אל יעזבך קשרם על גרגרותיך כתבם על לוח לבך׃
ד׳
ומצא חן ושכל טוב בעיני אלהים ואדם׃

בטח אל ה׳ בכל לבך

ה׳
בטח אל יהוה בכל לבך ואל בינתך אל תשען׃
ו׳
בכל דרכיך דעהו והוא יישר ארחתיך׃
ז׳
אל תהי חכם בעיניך ירא את יהוה וסור מרע׃
ח׳
רפאות תהי לשרך ושקוי לעצמותיך׃

כבד את ה׳ מהונך

ט׳
כבד את יהוה מהונך ומראשית כל תבואתך׃
י׳
וימלאו אסמיך שבע ותירוש יקביך יפרצו׃

אל תמאס במוסר

י״א
מוסר יהוה בני אל תמאס ואל תקץ בתוכחתו׃
י״ב
כי את אשר יאהב יהוה יוכיח וכאב את בן ירצה׃

ערכה היקר של החכמה

י״ג
אשרי אדם מצא חכמה ואדם יפיק תבונה׃
י״ד
כי טוב סחרה מסחר כסף ומחרוץ תבואתה׃
ט״ו
יקרה היא מפניים וכל חפציך לא ישוו בה׃
ט״ז
ארך ימים בימינה בשמאולה עשר וכבוד׃
י״ז
דרכיה דרכי נעם וכל נתיבותיה שלום׃
י״ח
עץ חיים היא למחזיקים בה ותמכיה מאשר׃
י״ט
יהוה בחכמה יסד ארץ כונן שמים בתבונה׃
כ׳
בדעתו תהומות נבקעו ושחקים ירעפו טל׃

החכמה מעניקה ביטחון ושלווה

כ״א
בני אל ילזו מעיניך נצר תשיה ומזמה׃
כ״ב
ויהיו חיים לנפשך וחן לגרגרתיך׃
כ״ג
אז תלך לבטח דרכך ורגלך לא תגוף׃
כ״ד
אם תשכב לא תפחד ושכבת וערבה שנתך׃
כ״ה
אל תירא מפחד פתאם ומשאת רשעים כי תבא׃
כ״ו
כי יהוה יהיה בכסלך ושמר רגלך מלכד׃

חיה בצדק עם רעיך

כ״ז
אל תמנע טוב מבעליו בהיות לאל ידיך לעשות׃
כ״ח
אל תאמר לרעיך לך ושוב ומחר אתן ויש אתך׃
כ״ט
אל תחרש על רעך רעה והוא יושב לבטח אתך׃
ל׳
אל תרוב עם אדם חנם אם לא גמלך רעה׃
ל״א
אל תקנא באיש חמס ואל תבחר בכל דרכיו׃
ל״ב
כי תועבת יהוה נלוז ואת ישרים סודו׃
ל״ג
מארת יהוה בבית רשע ונוה צדיקים יברך׃
ל״ד
אם ללצים הוא יליץ ולעניים יתן חן׃
ל״ה
כבוד חכמים ינחלו וכסילים מרים קלון׃
Use ← → arrow keys to navigate
Settings

Reading Style

Typeface

Font Size 19px

Reading Width 45 chars

Options