אִגֶּרֶת פּוֹלוֹס הַשָּׁלִיחַ אֶל־הָרוֹמִיִּים ט׳:ז׳-כ׳
ז׳
ולא על היותם זרע אברהם כלם בנים הם כי ביצחק יקרא לך זרע׃
ח׳
כלומר לא בני הבשר המה בני האלהים כי אם בני ההבטחה הם הנחשבים לזרע׃
ט׳
כי דבר הבטחה הוא מה שנאמר למועד אשוב ולשרה בן׃
י׳
ולא זאת בלבד כי כן היה גם ברבקה בהיותה הרה לאחד ליצחק אבינו׃
י״א
כי בטרם ילדו בניה ועוד לא עשו טוב או רע למען תקום עצת האלהים כפי בחירתו לא מתוך מעשים כי אם כרצון הקרא׃
י״ב
נאמר לה כי רב יעבד צעיר׃
י״ג
ככתוב ואהב את יעקב ואת עשו שנאתי׃
י״ד
אם כן מה נאמר הכי יש עול באלהים חלילה׃
ט״ו
כי למשה אמר וחנתי את אשר אחן ורחמתי את אשר ארחם׃
ט״ז
ועל כן אין הדבר לא ביד הרצה ולא ביד הרץ כי אם ביד האלהים המרחם׃
י״ז
כי כן הכתוב אמר לפרעה בעבור זאת העמדתיך בעבור הראתך את כחי ולמען ספר שמי בכל הארץ׃
י״ח
ויוצא מזה כי את אשר יחפץ יחננו ואת אשר יחפץ יקשהו׃
י״ט
וכי תאמר אלי מדוע יוכיח עוד נגד רצונו מי יתיצב׃
כ׳
אמנם בן אדם מי אתה אשר תריב את האלהים היאמר יצר ליצרו למה ככה עשיתני׃
נוסח המקרא: Hebrew Bible: the Masoretic text, unpointed (Old Testament); Franz Delitzsch's Hebrew translation (New Testament) · נחלת הכלל