ישוע מלמד על נישואין וגירושין

א׳

¶ ויקם משם וילך אל גבול יהודה מעבר הירדן ויקהלו עוד אליו המון עם וילמדם כפעם בפעם׃

ב׳

ויגשו אליו הפרושים וישאלהו אם יוכל איש לשלח את אשתו והם מנסים אתו׃

ג׳

ויען ויאמר אליהם מה צוה אתכם משה׃

ד׳

ויאמרו משה התיר לכתב ספר כריתת ולשלח׃

ה׳

ויען ישוע ויאמר אליהם בעבור קשי לבבכם כתב לכם את המצוה הזאת׃

ו׳

אבל מראשית הבריאה זכר ונקבה עשה אתם אלהים׃

ז׳

על כן יעזב איש את אביו ואת אמו ודבק באשתו׃

ח׳

והיו שניהם לבשר אחד ואם כן אפוא אינם עוד שנים כי אם בשר אחד׃

ט׳

לכן את אשר חבר אלהים לא יפרידנו אדם׃

י׳

ויהי בבית וישובו תלמידיו לשאל אתו על זאת׃

י״א

ויאמר אליהם המשלח את אשתו ולקח אחרת נאף הוא עליה׃

י״ב

ואשה כי תעזב אישה ולקחה איש אחר נאפת היא׃