הבְּשׂוֹרָה הַקְּדוֹשָׁה עַל־פִּי לוּקָס כ״א:א׳-י״ח
א׳
¶ ויבט וירא את העשירים משליכים את נדבותם לארון האוצר׃
ב׳
וירא גם אלמנה עניה נתנת בו שתי פרוטות׃
ג׳
ויאמר אמת אמר אני לכם כי האלמנה העניה הזאת נתנה יותר מכלם׃
ד׳
כי כל אלה התנדבו לאלהים מהעדף שלהם והיא מחסרונה את כל רכושה נתנה׃
ה׳
ויהי באמרם על המקדש כי מהדר הוא באבנים יפות ובמתנות ויאמר׃
ו׳
את אשר אתם ראים הנה ימים באים ולא תשאר אבן על אבן אשר לא תתפרק׃
ז׳
וישאלהו לאמר רבי מתי אפוא תהיה זאת ומה הוא האות לעת היותה׃
ח׳
ויאמר ראו פן תתעו כי רבים יבאו בשמי לאמר אני הוא והעת קרובה ואתם אל תלכו אחריהם׃
ט׳
ובשמעכם מלחמות ומהומות אל תחתו כי היו תהיה זאת לראשונה אך עוד קץ למועד׃
י׳
ויסף דבר אליהם לאמר יקום גוי על גוי וממלכה על ממלכה׃
י״א
והיה רעש גדול כה וכה ורעב ודבר וגם מוראים ואתות גדלות מן השמים׃
י״ב
ולפני כל אלה ישלחו בכם את ידיהם וירדפו וימסרו אתכם לבתי כנסיות ואל בתי כלאים ותובאו לפני מלכים ומשלים למען שמי׃
י״ג
והיתה זאת לכם לעדות׃
י״ד
על כן שיתו לבבכם לבלתי דאג במה תצטדקו׃
ט״ו
כי אנכי נתן לכם פה וחכמה אשר לא יוכלו לעמד לפניה ולדבר נגדה כל מתקוממיכם׃
ט״ז
וגם תמסרו על ידי יולדיכם ואחיכם וקרוביכם ורעיכם וימיתו מכם׃
י״ז
והייתם שנואים לכל אדם למען שמי׃
י״ח
אך לא יפל משערת ראשכם ארצה׃
Settings