אִיּוֹב כ״א:י״ח-ל״ג
י״ח
יהיו כתבן לפני רוח וכמץ גנבתו סופה׃
י״ט
אלוה יצפן לבניו אונו ישלם אליו וידע׃
כ׳
יראו עינו כידו ומחמת שדי ישתה׃
כ״א
כי מה חפצו בביתו אחריו ומספר חדשיו חצצו׃
כ״ב
הלאל ילמד דעת והוא רמים ישפוט׃
כ״ג
זה ימות בעצם תמו כלו שלאנן ושליו׃
כ״ד
עטיניו מלאו חלב ומח עצמותיו ישקה׃
כ״ה
וזה ימות בנפש מרה ולא אכל בטובה׃
כ״ו
יחד על עפר ישכבו ורמה תכסה עליהם׃
כ״ז
הן ידעתי מחשבותיכם ומזמות עלי תחמסו׃
כ״ח
כי תאמרו איה בית נדיב ואיה אהל משכנות רשעים׃
כ״ט
הלא שאלתם עוברי דרך ואתתם לא תנכרו׃
ל׳
כי ליום איד יחשך רע ליום עברות יובלו׃
ל״א
מי יגיד על פניו דרכו והוא עשה מי ישלם לו׃
ל״ב
והוא לקברות יובל ועל גדיש ישקוד׃
ל״ג
מתקו לו רגבי נחל ואחריו כל אדם ימשוך ולפניו אין מספר׃
נוסח המקרא: Hebrew Bible: the Masoretic text, unpointed (Old Testament); Franz Delitzsch's Hebrew translation (New Testament) · נחלת הכלל