TRV
יְשַׁעְיָהוּ מ׳:י״ב-כ״ד
י״ב
מי מדד בשעלו מים ושמים בזרת תכן וכל בשלש עפר הארץ ושקל בפלס הרים וגבעות במאזנים׃
י״ג
מי תכן את רוח יהוה ואיש עצתו יודיענו׃
י״ד
את מי נועץ ויבינהו וילמדהו בארח משפט וילמדהו דעת ודרך תבונות יודיענו׃
ט״ו
הן גוים כמר מדלי וכשחק מאזנים נחשבו הן איים כדק יטול׃
ט״ז
ולבנון אין די בער וחיתו אין די עולה׃
י״ז
כל הגוים כאין נגדו מאפס ותהו נחשבו לו׃
י״ח
ואל מי תדמיון אל ומה דמות תערכו לו׃
י״ט
הפסל נסך חרש וצרף בזהב ירקענו ורתקות כסף צורף׃
כ׳
המסכן תרומה עץ לא ירקב יבחר חרש חכם יבקש לו להכין פסל לא ימוט׃
כ״א
הלוא תדעו הלוא תשמעו הלוא הגד מראש לכם הלוא הבינתם מוסדות הארץ׃
כ״ב
הישב על חוג הארץ וישביה כחגבים הנוטה כדק שמים וימתחם כאהל לשבת׃
כ״ג
הנותן רוזנים לאין שפטי ארץ כתהו עשה׃
כ״ד
אף בל נטעו אף בל זרעו אף בל שרש בארץ גזעם וגם נשף בהם ויבשו וסערה כקש תשאם׃
Settings