TRV
יְשַׁעְיָהוּ מ׳:א׳-י״א
א׳
¶ נחמו נחמו עמי יאמר אלהיכם׃
ב׳
דברו על לב ירושלם וקראו אליה כי מלאה צבאה כי נרצה עונה כי לקחה מיד יהוה כפלים בכל חטאתיה׃
ג׳
קול קורא במדבר פנו דרך יהוה ישרו בערבה מסלה לאלהינו׃
ד׳
כל גיא ינשא וכל הר וגבעה ישפלו והיה העקב למישור והרכסים לבקעה׃
ה׳
ונגלה כבוד יהוה וראו כל בשר יחדו כי פי יהוה דבר׃
ו׳
קול אמר קרא ואמר מה אקרא כל הבשר חציר וכל חסדו כציץ השדה׃
ז׳
יבש חציר נבל ציץ כי רוח יהוה נשבה בו אכן חציר העם׃
ח׳
יבש חציר נבל ציץ ודבר אלהינו יקום לעולם׃
ט׳
על הר גבה עלי לך מבשרת ציון הרימי בכח קולך מבשרת ירושלם הרימי אל תיראי אמרי לערי יהודה הנה אלהיכם׃
י׳
הנה אדני יהוה בחזק יבוא וזרעו משלה לו הנה שכרו אתו ופעלתו לפניו׃
י״א
כרעה עדרו ירעה בזרעו יקבץ טלאים ובחיקו ישא עלות ינהל׃
Settings