הולדת יצחק ושמו

בְּרֵאשִׁית כ״א:א׳-ח׳

א׳

¶ ויהוה פקד את שרה כאשר אמר ויעש יהוה לשרה כאשר דבר׃

ב׳

ותהר ותלד שרה לאברהם בן לזקניו למועד אשר דבר אתו אלהים׃

ג׳

ויקרא אברהם את שם בנו הנולד לו אשר ילדה לו שרה יצחק׃

ד׳

וימל אברהם את יצחק בנו בן שמנת ימים כאשר צוה אתו אלהים׃

ה׳

ואברהם בן מאת שנה בהולד לו את יצחק בנו׃

ו׳

ותאמר שרה צחק עשה לי אלהים כל השמע יצחק לי׃

ז׳

ותאמר מי מלל לאברהם היניקה בנים שרה כי ילדתי בן לזקניו׃

ח׳

ויגדל הילד ויגמל ויעש אברהם משתה גדול ביום הגמל את יצחק׃