פסוקים על Shunammite

30 פסוקים · 1 היבט

פסוקי מפתח

2 מְלָכִים ד׳:ח׳
ויהי היום ויעבר אלישע אל שונם ושם אשה גדולה ותחזק בו לאכל לחם ויהי מדי עברו יסר שמה לאכל לחם׃
2 מְלָכִים ד׳:ט׳
ותאמר אל אישה הנה נא ידעתי כי איש אלהים קדוש הוא עבר עלינו תמיד׃
2 מְלָכִים ד׳:י׳
נעשה נא עלית קיר קטנה ונשים לו שם מטה ושלחן וכסא ומנורה והיה בבאו אלינו יסור שמה׃
2 מְלָכִים ד׳:י״א
ויהי היום ויבא שמה ויסר אל העליה וישכב שמה׃
2 מְלָכִים ד׳:י״ב
ויאמר אל גחזי נערו קרא לשונמית הזאת ויקרא לה ותעמד לפניו׃
2 מְלָכִים ד׳:י״ג
ויאמר לו אמר נא אליה הנה חרדת אלינו את כל החרדה הזאת מה לעשות לך היש לדבר לך אל המלך או אל שר הצבא ותאמר בתוך עמי אנכי ישבת׃
2 מְלָכִים ד׳:י״ד
ויאמר ומה לעשות לה ויאמר גיחזי אבל בן אין לה ואישה זקן׃
2 מְלָכִים ד׳:ט״ו
ויאמר קרא לה ויקרא לה ותעמד בפתח׃
2 מְלָכִים ד׳:ט״ז
ויאמר למועד הזה כעת חיה אתי חבקת בן ותאמר אל אדני איש האלהים אל תכזב בשפחתך׃
2 מְלָכִים ד׳:י״ז
ותהר האשה ותלד בן למועד הזה כעת חיה אשר דבר אליה אלישע׃
2 מְלָכִים ד׳:י״ח
ויגדל הילד ויהי היום ויצא אל אביו אל הקצרים׃
2 מְלָכִים ד׳:י״ט
ויאמר אל אביו ראשי ראשי ויאמר אל הנער שאהו אל אמו׃
2 מְלָכִים ד׳:כ׳
וישאהו ויביאהו אל אמו וישב על ברכיה עד הצהרים וימת׃
2 מְלָכִים ד׳:כ״א
ותעל ותשכבהו על מטת איש האלהים ותסגר בעדו ותצא׃
2 מְלָכִים ד׳:כ״ב
ותקרא אל אישה ותאמר שלחה נא לי אחד מן הנערים ואחת האתנות וארוצה עד איש האלהים ואשובה׃
2 מְלָכִים ד׳:כ״ג
ויאמר מדוע אתי הלכתי אליו היום לא חדש ולא שבת ותאמר שלום׃
2 מְלָכִים ד׳:כ״ד
ותחבש האתון ותאמר אל נערה נהג ולך אל תעצר לי לרכב כי אם אמרתי לך׃
2 מְלָכִים ד׳:כ״ה
ותלך ותבוא אל איש האלהים אל הר הכרמל ויהי כראות איש האלהים אתה מנגד ויאמר אל גיחזי נערו הנה השונמית הלז׃
2 מְלָכִים ד׳:כ״ו
עתה רוץ נא לקראתה ואמר לה השלום לך השלום לאישך השלום לילד ותאמר שלום׃
2 מְלָכִים ד׳:כ״ז
ותבא אל איש האלהים אל ההר ותחזק ברגליו ויגש גיחזי להדפה ויאמר איש האלהים הרפה לה כי נפשה מרה לה ויהוה העלים ממני ולא הגיד לי׃
2 מְלָכִים ד׳:כ״ח
ותאמר השאלתי בן מאת אדני הלא אמרתי לא תשלה אתי׃
2 מְלָכִים ד׳:כ״ט
ויאמר לגיחזי חגר מתניך וקח משענתי בידך ולך כי תמצא איש לא תברכנו וכי יברכך איש לא תעננו ושמת משענתי על פני הנער׃
2 מְלָכִים ד׳:ל׳
ותאמר אם הנער חי יהוה וחי נפשך אם אעזבך ויקם וילך אחריה׃
2 מְלָכִים ד׳:ל״א
וגחזי עבר לפניהם וישם את המשענת על פני הנער ואין קול ואין קשב וישב לקראתו ויגד לו לאמר לא הקיץ הנער׃
2 מְלָכִים ד׳:ל״ב
ויבא אלישע הביתה והנה הנער מת משכב על מטתו׃

מציג 1–25 מתוך 30 פסוקים

1 2 הבא