פסוקים על Queen: Of Sheba, visits Solomon

13 פסוקים · 9 היבטים

פסוקים על Of Sheba, visits Solomon

  1. 1 מְלָכִים י׳:א׳

    ¶ ומלכת שבא שמעת את שמע שלמה לשם יהוה ותבא לנסתו בחידות׃

  2. 1 מְלָכִים י׳:ב׳

    ותבא ירושלמה בחיל כבד מאד גמלים נשאים בשמים וזהב רב מאד ואבן יקרה ותבא אל שלמה ותדבר אליו את כל אשר היה עם לבבה׃

  3. 1 מְלָכִים י׳:ג׳

    ויגד לה שלמה את כל דבריה לא היה דבר נעלם מן המלך אשר לא הגיד לה׃

  4. 1 מְלָכִים י׳:ד׳

    ותרא מלכת שבא את כל חכמת שלמה והבית אשר בנה׃

  5. 1 מְלָכִים י׳:ה׳

    ומאכל שלחנו ומושב עבדיו ומעמד משרתו ומלבשיהם ומשקיו ועלתו אשר יעלה בית יהוה ולא היה בה עוד רוח׃

  6. 1 מְלָכִים י׳:ו׳

    ותאמר אל המלך אמת היה הדבר אשר שמעתי בארצי על דבריך ועל חכמתך׃

  7. 1 מְלָכִים י׳:ז׳

    ולא האמנתי לדברים עד אשר באתי ותראינה עיני והנה לא הגד לי החצי הוספת חכמה וטוב אל השמועה אשר שמעתי׃

  8. 1 מְלָכִים י׳:ח׳

    אשרי אנשיך אשרי עבדיך אלה העמדים לפניך תמיד השמעים את חכמתך׃

  9. 1 מְלָכִים י׳:ט׳

    יהי יהוה אלהיך ברוך אשר חפץ בך לתתך על כסא ישראל באהבת יהוה את ישראל לעלם וישימך למלך לעשות משפט וצדקה׃

  10. 1 מְלָכִים י׳:י׳

    ותתן למלך מאה ועשרים ככר זהב ובשמים הרבה מאד ואבן יקרה לא בא כבשם ההוא עוד לרב אשר נתנה מלכת שבא למלך שלמה׃

  11. 1 מְלָכִים י׳:י״א

    וגם אני חירם אשר נשא זהב מאופיר הביא מאפיר עצי אלמגים הרבה מאד ואבן יקרה׃

  12. 1 מְלָכִים י׳:י״ב

    ויעש המלך את עצי האלמגים מסעד לבית יהוה ולבית המלך וכנרות ונבלים לשרים לא בא כן עצי אלמגים ולא נראה עד היום הזה׃

  13. 1 מְלָכִים י׳:י״ג

    והמלך שלמה נתן למלכת שבא את כל חפצה אשר שאלה מלבד אשר נתן לה כיד המלך שלמה ותפן ותלך לארצה היא ועבדיה׃