פסוקים על Naboth

35 פסוקים · 2 היבטים

פסוקי מפתח

1 מְלָכִים כ״א:א׳
¶ ויהי אחר הדברים האלה כרם היה לנבות היזרעאלי אשר ביזרעאל אצל היכל אחאב מלך שמרון׃
1 מְלָכִים כ״א:ב׳
וידבר אחאב אל נבות לאמר תנה לי את כרמך ויהי לי לגן ירק כי הוא קרוב אצל ביתי ואתנה לך תחתיו כרם טוב ממנו אם טוב בעיניך אתנה לך כסף מחיר זה׃
1 מְלָכִים כ״א:ג׳
ויאמר נבות אל אחאב חלילה לי מיהוה מתתי את נחלת אבתי לך׃
1 מְלָכִים כ״א:ד׳
ויבא אחאב אל ביתו סר וזעף על הדבר אשר דבר אליו נבות היזרעאלי ויאמר לא אתן לך את נחלת אבותי וישכב על מטתו ויסב את פניו ולא אכל לחם׃
1 מְלָכִים כ״א:ה׳
ותבא אליו איזבל אשתו ותדבר אליו מה זה רוחך סרה ואינך אכל לחם׃
1 מְלָכִים כ״א:ו׳
וידבר אליה כי אדבר אל נבות היזרעאלי ואמר לו תנה לי את כרמך בכסף או אם חפץ אתה אתנה לך כרם תחתיו ויאמר לא אתן לך את כרמי׃
1 מְלָכִים כ״א:ז׳
ותאמר אליו איזבל אשתו אתה עתה תעשה מלוכה על ישראל קום אכל לחם ויטב לבך אני אתן לך את כרם נבות היזרעאלי׃
1 מְלָכִים כ״א:ח׳
ותכתב ספרים בשם אחאב ותחתם בחתמו ותשלח הספרים אל הזקנים ואל החרים אשר בעירו הישבים את נבות׃
1 מְלָכִים כ״א:ט׳
ותכתב בספרים לאמר קראו צום והושיבו את נבות בראש העם׃
1 מְלָכִים כ״א:י׳
והושיבו שנים אנשים בני בליעל נגדו ויעדהו לאמר ברכת אלהים ומלך והוציאהו וסקלהו וימת׃
1 מְלָכִים כ״א:י״א
ויעשו אנשי עירו הזקנים והחרים אשר הישבים בעירו כאשר שלחה אליהם איזבל כאשר כתוב בספרים אשר שלחה אליהם׃
1 מְלָכִים כ״א:י״ב
קראו צום והשיבו את נבות בראש העם׃
1 מְלָכִים כ״א:י״ג
ויבאו שני האנשים בני בליעל וישבו נגדו ויעדהו אנשי הבליעל את נבות נגד העם לאמר ברך נבות אלהים ומלך ויצאהו מחוץ לעיר ויסקלהו באבנים וימת׃
1 מְלָכִים כ״א:י״ד
וישלחו אל איזבל לאמר סקל נבות וימת׃
1 מְלָכִים כ״א:ט״ו
ויהי כשמע איזבל כי סקל נבות וימת ותאמר איזבל אל אחאב קום רש את כרם נבות היזרעאלי אשר מאן לתת לך בכסף כי אין נבות חי כי מת׃
1 מְלָכִים כ״א:ט״ז
ויהי כשמע אחאב כי מת נבות ויקם אחאב לרדת אל כרם נבות היזרעאלי לרשתו׃
1 מְלָכִים כ״א:י״ז
ויהי דבר יהוה אל אליהו התשבי לאמר׃
1 מְלָכִים כ״א:י״ח
קום רד לקראת אחאב מלך ישראל אשר בשמרון הנה בכרם נבות אשר ירד שם לרשתו׃
1 מְלָכִים כ״א:י״ט
ודברת אליו לאמר כה אמר יהוה הרצחת וגם ירשת ודברת אליו לאמר כה אמר יהוה במקום אשר לקקו הכלבים את דם נבות ילקו הכלבים את דמך גם אתה׃
2 מְלָכִים ט׳:כ״א
ויאמר יהורם אסר ויאסר רכבו ויצא יהורם מלך ישראל ואחזיהו מלך יהודה איש ברכבו ויצאו לקראת יהוא וימצאהו בחלקת נבות היזרעאלי׃
2 מְלָכִים ט׳:כ״ב
ויהי כראות יהורם את יהוא ויאמר השלום יהוא ויאמר מה השלום עד זנוני איזבל אמך וכשפיה הרבים׃
2 מְלָכִים ט׳:כ״ג
ויהפך יהורם ידיו וינס ויאמר אל אחזיהו מרמה אחזיה׃
2 מְלָכִים ט׳:כ״ד
ויהוא מלא ידו בקשת ויך את יהורם בין זרעיו ויצא החצי מלבו ויכרע ברכבו׃
2 מְלָכִים ט׳:כ״ה
ויאמר אל בדקר שלשה שא השלכהו בחלקת שדה נבות היזרעאלי כי זכר אני ואתה את רכבים צמדים אחרי אחאב אביו ויהוה נשא עליו את המשא הזה׃
2 מְלָכִים ט׳:כ״ו
אם לא את דמי נבות ואת דמי בניו ראיתי אמש נאם יהוה ושלמתי לך בחלקה הזאת נאם יהוה ועתה שא השלכהו בחלקה כדבר יהוה׃

מציג 1–25 מתוך 35 פסוקים

1 2 הבא