1 שְׁמוּאֵלח׳

בני שמואל שופטים בעוולה

א׳
ויהי כאשר זקן שמואל וישם את בניו שפטים לישראל׃
ב׳
ויהי שם בנו הבכור יואל ושם משנהו אביה שפטים בבאר שבע׃
ג׳
ולא הלכו בניו בדרכו ויטו אחרי הבצע ויקחו שחד ויטו משפט׃

ישראל דורשת מלך

ד׳
ויתקבצו כל זקני ישראל ויבאו אל שמואל הרמתה׃
ה׳
ויאמרו אליו הנה אתה זקנת ובניך לא הלכו בדרכיך עתה שימה לנו מלך לשפטנו ככל הגוים׃
ו׳
וירע הדבר בעיני שמואל כאשר אמרו תנה לנו מלך לשפטנו ויתפלל שמואל אל יהוה׃

אלוהים רואה בבקשה דחייתו

ז׳
ויאמר יהוה אל שמואל שמע בקול העם לכל אשר יאמרו אליך כי לא אתך מאסו כי אתי מאסו ממלך עליהם׃
ח׳
ככל המעשים אשר עשו מיום העלתי אתם ממצרים ועד היום הזה ויעזבני ויעבדו אלהים אחרים כן המה עשים גם לך׃
ט׳
ועתה שמע בקולם אך כי העד תעיד בהם והגדת להם משפט המלך אשר ימלך עליהם׃

האזהרה: משפט המלך

י׳
ויאמר שמואל את כל דברי יהוה אל העם השאלים מאתו מלך׃
י״א
ויאמר זה יהיה משפט המלך אשר ימלך עליכם את בניכם יקח ושם לו במרכבתו ובפרשיו ורצו לפני מרכבתו׃
י״ב
ולשום לו שרי אלפים ושרי חמשים ולחרש חרישו ולקצר קצירו ולעשות כלי מלחמתו וכלי רכבו׃
י״ג
ואת בנותיכם יקח לרקחות ולטבחות ולאפות׃
י״ד
ואת שדותיכם ואת כרמיכם וזיתיכם הטובים יקח ונתן לעבדיו׃
ט״ו
וזרעיכם וכרמיכם יעשר ונתן לסריסיו ולעבדיו׃
ט״ז
ואת עבדיכם ואת שפחותיכם ואת בחוריכם הטובים ואת חמוריכם יקח ועשה למלאכתו׃
י״ז
צאנכם יעשר ואתם תהיו לו לעבדים׃
י״ח
וזעקתם ביום ההוא מלפני מלככם אשר בחרתם לכם ולא יענה יהוה אתכם ביום ההוא׃

העם עומד בדרישתו ואלוהים מסכים

י״ט
וימאנו העם לשמע בקול שמואל ויאמרו לא כי אם מלך יהיה עלינו׃
כ׳
והיינו גם אנחנו ככל הגוים ושפטנו מלכנו ויצא לפנינו ונלחם את מלחמתנו׃
כ״א
וישמע שמואל את כל דברי העם וידברם באזני יהוה׃
כ״ב
ויאמר יהוה אל שמואל שמע בקולם והמלכת להם מלך ויאמר שמואל אל אנשי ישראל לכו איש לעירו׃
Use ← → arrow keys to navigate
Settings

Reading Style

Typeface

Font Size 19px

Reading Width 45 chars

Options