ישוע מאכיל ארבעת אלפים איש

כ״ט

ויעבר ישוע משם ויבא אל ים הגליל ויעל ההרה וישב שם׃

ל׳

ויבאו אליו המון עם רב ועמהם פסחים עורים חרשים קטעים ורבים כהמה ויפילום לרגלי ישוע וירפאם׃

ל״א

ויתמהו העם בראותם את האלמים מדברים והקטעים בריאים והפסחים מתהלכים והעורים ראים וישבחו את אלהי ישראל׃

ל״ב

ויקרא ישוע אל תלמידיו ויאמר נכמרו רחמי על העם כי זה שלשת ימים עמדו עמדי ואין להם מה לאכל ואינני אבה לשלחם רעבים פן יתעלפו בדרך׃

ל״ג

ויאמרו אליו התלמידים מאין לנו די לחם במדבר להשביע את ההמון הגדול הזה׃

ל״ד

ויאמר ישוע אליהם כמה ככרות לחם לכם ויאמרו שבע ומעט דגים קטנים׃

ל״ה

ויצו את המון העם לשבת לארץ׃

ל״ו

ויקח את שבע ככרות הלחם ואת הדגים ויברך ויפרס ויתן אל התלמידים והתלמידים נתנו לעם׃

ל״ז

ויאכלו כלם וישבעו וישאו מן הפתותים הנותרים שבעה דודים מלאים׃

ל״ח

והאכלים היו ארבעת אלפי איש מלבד הנשים והטף׃

ל״ט

וישלח את העם וירד באניה ויבא אל גבול מגדלא׃