ישוע נאסר בגן

א׳

¶ ויהי ככלות ישוע לדבר את הדברים האלה ויצא החוצה עם תלמידיו מעבר לנחל קדרון ושם גן ויבא בו הוא ותלמידיו׃

ב׳

וגם יהודה מוסרו ידע את המקום כי פעמים רבות נועד שמה ישוע עם תלמידיו׃

ג׳

ויקח יהודה את הגדוד ומשרתים מאת הכהנים הגדולים והפרושים ויבא שמה בנרות ובלפידים ובכלי נשק׃

ד׳

וישוע ידע את כל אשר יבא עליו ויצא ויאמר אליהם את מי תבקשו׃

ה׳

ויענו ויאמרו את ישוע הנצרי ויאמר אליהם ישוע אני הוא וגם יהודה מוסרו עמד אצלם׃

ו׳

ויהי בדבר ישוע אליהם אני הוא ויסגו אחור ויפלו ארצה׃

ז׳

ויסף וישאל אתם את מי תבקשו ויאמרו את ישוע הנצרי׃

ח׳

ויען ישוע הלא אמרתי לכם אני הוא לכן אם אתי תבקשו הניחו לאלה וילכו׃

ט׳

למלאת הדבר אשר אמר מאלה אשר נתת לי לא אבד לי אף אחד׃

י׳

ולשמעון פטרוס חרב וישלפה ויך את עבד הכהן הגדול ויקצץ את אזנו הימנית ושם העבד מלכוס׃

י״א

ויאמר ישוע אל פטרוס השב חרבך אל נדנה הכי לא אשתה את הכוס אשר נתן לי אבי׃

י״ב

אז תפשו הגדוד ושר האלף ומשרתי היהודים את ישוע ויאסרהו׃