יוֹאֵל ג׳:א׳-ה׳

א׳

¶ כי הנה בימים ההמה ובעת ההיא אשר אשוב את שבות יהודה וירושלם׃

ב׳

וקבצתי את כל הגוים והורדתים אל עמק יהושפט ונשפטתי עמם שם על עמי ונחלתי ישראל אשר פזרו בגוים ואת ארצי חלקו׃

ג׳

ואל עמי ידו גורל ויתנו הילד בזונה והילדה מכרו ביין וישתו׃

ד׳

וגם מה אתם לי צר וצידון וכל גלילות פלשת הגמול אתם משלמים עלי ואם גמלים אתם עלי קל מהרה אשיב גמלכם בראשכם׃

ה׳

אשר כספי וזהבי לקחתם ומחמדי הטבים הבאתם להיכליכם׃