TRV
הוֹשֵׁעַ י׳:א׳-ח׳
א׳
¶ גפן בוקק ישראל פרי ישוה לו כרב לפריו הרבה למזבחות כטוב לארצו היטיבו מצבות׃
ב׳
חלק לבם עתה יאשמו הוא יערף מזבחותם ישדד מצבותם׃
ג׳
כי עתה יאמרו אין מלך לנו כי לא יראנו את יהוה והמלך מה יעשה לנו׃
ד׳
דברו דברים אלות שוא כרת ברית ופרח כראש משפט על תלמי שדי׃
ה׳
לעגלות בית און יגורו שכן שמרון כי אבל עליו עמו וכמריו עליו יגילו על כבודו כי גלה ממנו׃
ו׳
גם אותו לאשור יובל מנחה למלך ירב בשנה אפרים יקח ויבוש ישראל מעצתו׃
ז׳
נדמה שמרון מלכה כקצף על פני מים׃
ח׳
ונשמדו במות און חטאת ישראל קוץ ודרדר יעלה על מזבחותם ואמרו להרים כסונו ולגבעות נפלו עלינו׃
Settings