TRV
בְּרֵאשִׁית כ״ד:י׳-כ״ח
י׳
ויקח העבד עשרה גמלים מגמלי אדניו וילך וכל טוב אדניו בידו ויקם וילך אל ארם נהרים אל עיר נחור׃
י״א
ויברך הגמלים מחוץ לעיר אל באר המים לעת ערב לעת צאת השאבת׃
י״ב
ויאמר יהוה אלהי אדני אברהם הקרה נא לפני היום ועשה חסד עם אדני אברהם׃
י״ג
הנה אנכי נצב על עין המים ובנות אנשי העיר יצאת לשאב מים׃
י״ד
והיה הנער אשר אמר אליה הטי נא כדך ואשתה ואמרה שתה וגם גמליך אשקה אתה הכחת לעבדך ליצחק ובה אדע כי עשית חסד עם אדני׃
ט״ו
ויהי הוא טרם כלה לדבר והנה רבקה יצאת אשר ילדה לבתואל בן מלכה אשת נחור אחי אברהם וכדה על שכמה׃
ט״ז
והנער טבת מראה מאד בתולה ואיש לא ידעה ותרד העינה ותמלא כדה ותעל׃
י״ז
וירץ העבד לקראתה ויאמר הגמיאיני נא מעט מים מכדך׃
י״ח
ותאמר שתה אדני ותמהר ותרד כדה על ידה ותשקהו׃
י״ט
ותכל להשקתו ותאמר גם לגמליך אשאב עד אם כלו לשתת׃
כ׳
ותמהר ותער כדה אל השקת ותרץ עוד אל הבאר לשאב ותשאב לכל גמליו׃
כ״א
והאיש משתאה לה מחריש לדעת ההצליח יהוה דרכו אם לא׃
כ״ב
ויהי כאשר כלו הגמלים לשתות ויקח האיש נזם זהב בקע משקלו ושני צמידים על ידיה עשרה זהב משקלם׃
כ״ג
ויאמר בת מי את הגידי נא לי היש בית אביך מקום לנו ללין׃
כ״ד
ותאמר אליו בת בתואל אנכי בן מלכה אשר ילדה לנחור׃
כ״ה
ותאמר אליו גם תבן גם מספוא רב עמנו גם מקום ללון׃
כ״ו
ויקד האיש וישתחו ליהוה׃
כ״ז
ויאמר ברוך יהוה אלהי אדני אברהם אשר לא עזב חסדו ואמתו מעם אדני אנכי בדרך נחני יהוה בית אחי אדני׃
כ״ח
ותרץ הנער ותגד לבית אמה כדברים האלה׃
Settings