דְּבָרִים ל״ג:י״ג-כ״ט
י״ג
וליוסף אמר מברכת יהוה ארצו ממגד שמים מטל ומתהום רבצת תחת׃
י״ד
וממגד תבואת שמש וממגד גרש ירחים׃
ט״ו
ומראש הררי קדם וממגד גבעות עולם׃
ט״ז
וממגד ארץ ומלאה ורצון שכני סנה תבואתה לראש יוסף ולקדקד נזיר אחיו׃
י״ז
בכור שורו הדר לו וקרני ראם קרניו בהם עמים ינגח יחדו אפסי ארץ והם רבבות אפרים והם אלפי מנשה׃
י״ח
ולזבולן אמר שמח זבולן בצאתך ויששכר באהליך׃
י״ט
עמים הר יקראו שם יזבחו זבחי צדק כי שפע ימים יינקו ושפוני טמוני חול׃
כ׳
ולגד אמר ברוך מרחיב גד כלביא שכן וטרף זרוע אף קדקד׃
כ״א
וירא ראשית לו כי שם חלקת מחקק ספון ויתא ראשי עם צדקת יהוה עשה ומשפטיו עם ישראל׃
כ״ב
ולדן אמר דן גור אריה יזנק מן הבשן׃
כ״ג
ולנפתלי אמר נפתלי שבע רצון ומלא ברכת יהוה ים ודרום ירשה׃
כ״ד
ולאשר אמר ברוך מבנים אשר יהי רצוי אחיו וטבל בשמן רגלו׃
כ״ה
ברזל ונחשת מנעליך וכימיך דבאך׃
כ״ו
אין כאל ישרון רכב שמים בעזרך ובגאותו שחקים׃
כ״ז
מענה אלהי קדם ומתחת זרעת עולם ויגרש מפניך אויב ויאמר השמד׃
כ״ח
וישכן ישראל בטח בדד עין יעקב אל ארץ דגן ותירוש אף שמיו יערפו טל׃
כ״ט
אשריך ישראל מי כמוך עם נושע ביהוה מגן עזרך ואשר חרב גאותך ויכחשו איביך לך ואתה על במותימו תדרך׃
נוסח המקרא: Hebrew Bible: the Masoretic text, unpointed (Old Testament); Franz Delitzsch's Hebrew translation (New Testament) · נחלת הכלל