1 שְׁמוּאֵל ט״ו:כ״ח-ל״ה

כ״ח

ויאמר אליו שמואל קרע יהוה את ממלכות ישראל מעליך היום ונתנה לרעך הטוב ממך׃

כ״ט

וגם נצח ישראל לא ישקר ולא ינחם כי לא אדם הוא להנחם׃

ל׳

ויאמר חטאתי עתה כבדני נא נגד זקני עמי ונגד ישראל ושוב עמי והשתחויתי ליהוה אלהיך׃

ל״א

וישב שמואל אחרי שאול וישתחו שאול ליהוה׃

ל״ב

ויאמר שמואל הגישו אלי את אגג מלך עמלק וילך אליו אגג מעדנת ויאמר אגג אכן סר מר המות׃

ל״ג

ויאמר שמואל כאשר שכלה נשים חרבך כן תשכל מנשים אמך וישסף שמואל את אגג לפני יהוה בגלגל׃

ל״ד

וילך שמואל הרמתה ושאול עלה אל ביתו גבעת שאול׃

ל״ה

ולא יסף שמואל לראות את שאול עד יום מותו כי התאבל שמואל אל שאול ויהוה נחם כי המליך את שאול על ישראל׃

נוסח המקרא: Hebrew Bible: the Masoretic text, unpointed (Old Testament); Franz Delitzsch's Hebrew translation (New Testament) · נחלת הכלל