פסוקים על Sodom: Abraham's intercession for

18 פסוקים · 8 היבטים

פסוקים על Abraham's intercession for

  1. בְּרֵאשִׁית י״ח:ט״ז

    ויקמו משם האנשים וישקפו על פני סדם ואברהם הלך עמם לשלחם׃

  2. בְּרֵאשִׁית י״ח:י״ז

    ויהוה אמר המכסה אני מאברהם אשר אני עשה׃

  3. בְּרֵאשִׁית י״ח:י״ח

    ואברהם היו יהיה לגוי גדול ועצום ונברכו בו כל גויי הארץ׃

  4. בְּרֵאשִׁית י״ח:י״ט

    כי ידעתיו למען אשר יצוה את בניו ואת ביתו אחריו ושמרו דרך יהוה לעשות צדקה ומשפט למען הביא יהוה על אברהם את אשר דבר עליו׃

  5. בְּרֵאשִׁית י״ח:כ׳

    ויאמר יהוה זעקת סדם ועמרה כי רבה וחטאתם כי כבדה מאד׃

  6. בְּרֵאשִׁית י״ח:כ״א

    ארדה נא ואראה הכצעקתה הבאה אלי עשו כלה ואם לא אדעה׃

  7. בְּרֵאשִׁית י״ח:כ״ב

    ויפנו משם האנשים וילכו סדמה ואברהם עודנו עמד לפני יהוה׃

  8. בְּרֵאשִׁית י״ח:כ״ג

    ויגש אברהם ויאמר האף תספה צדיק עם רשע׃

  9. בְּרֵאשִׁית י״ח:כ״ד

    אולי יש חמשים צדיקם בתוך העיר האף תספה ולא תשא למקום למען חמשים הצדיקם אשר בקרבה׃

  10. בְּרֵאשִׁית י״ח:כ״ה

    חללה לך מעשת כדבר הזה להמית צדיק עם רשע והיה כצדיק כרשע חללה לך השפט כל הארץ לא יעשה משפט׃

  11. בְּרֵאשִׁית י״ח:כ״ו

    ויאמר יהוה אם אמצא בסדם חמשים צדיקם בתוך העיר ונשאתי לכל המקום בעבורם׃

  12. בְּרֵאשִׁית י״ח:כ״ז

    ויען אברהם ויאמר הנה נא הואלתי לדבר אל אדני ואנכי עפר ואפר׃

  13. בְּרֵאשִׁית י״ח:כ״ח

    אולי יחסרון חמשים הצדיקם חמשה התשחית בחמשה את כל העיר ויאמר לא אשחית אם אמצא שם ארבעים וחמשה׃

  14. בְּרֵאשִׁית י״ח:כ״ט

    ויסף עוד לדבר אליו ויאמר אולי ימצאון שם ארבעים ויאמר לא אעשה בעבור הארבעים׃

  15. בְּרֵאשִׁית י״ח:ל׳

    ויאמר אל נא יחר לאדני ואדברה אולי ימצאון שם שלשים ויאמר לא אעשה אם אמצא שם שלשים׃

  16. בְּרֵאשִׁית י״ח:ל״א

    ויאמר הנה נא הואלתי לדבר אל אדני אולי ימצאון שם עשרים ויאמר לא אשחית בעבור העשרים׃

  17. בְּרֵאשִׁית י״ח:ל״ב

    ויאמר אל נא יחר לאדני ואדברה אך הפעם אולי ימצאון שם עשרה ויאמר לא אשחית בעבור העשרה׃

  18. בְּרֵאשִׁית י״ח:ל״ג

    וילך יהוה כאשר כלה לדבר אל אברהם ואברהם שב למקמו׃