פסוקים על Shem: Descendants of

¶ ואלה תולדת בני נח שם חם ויפת ויולדו להם בנים אחר המבול׃

ולשם ילד גם הוא אבי כל בני עבר אחי יפת הגדול׃

בני שם עילם ואשור וארפכשד ולוד וארם׃

ובני ארם עוץ וחול וגתר ומש׃

וארפכשד ילד את שלח ושלח ילד את עבר׃

ולעבר ילד שני בנים שם האחד פלג כי בימיו נפלגה הארץ ושם אחיו יקטן׃

ויקטן ילד את אלמודד ואת שלף ואת חצרמות ואת ירח׃

ואת הדורם ואת אוזל ואת דקלה׃

ואת עובל ואת אבימאל ואת שבא׃

ואת אופר ואת חוילה ואת יובב כל אלה בני יקטן׃

ויהי מושבם ממשא באכה ספרה הר הקדם׃

אלה בני שם למשפחתם ללשנתם בארצתם לגויהם׃

אלה תולדת שם שם בן מאת שנה ויולד את ארפכשד שנתים אחר המבול׃

ויחי שם אחרי הולידו את ארפכשד חמש מאות שנה ויולד בנים ובנות׃

וארפכשד חי חמש ושלשים שנה ויולד את שלח׃

ויחי ארפכשד אחרי הולידו את שלח שלש שנים וארבע מאות שנה ויולד בנים ובנות׃

ושלח חי שלשים שנה ויולד את עבר׃

ויחי שלח אחרי הולידו את עבר שלש שנים וארבע מאות שנה ויולד בנים ובנות׃

ויחי עבר ארבע ושלשים שנה ויולד את פלג׃

ויחי עבר אחרי הולידו את פלג שלשים שנה וארבע מאות שנה ויולד בנים ובנות׃

ויחי פלג שלשים שנה ויולד את רעו׃

ויחי פלג אחרי הולידו את רעו תשע שנים ומאתים שנה ויולד בנים ובנות׃

ויחי רעו שתים ושלשים שנה ויולד את שרוג׃

ויחי רעו אחרי הולידו את שרוג שבע שנים ומאתים שנה ויולד בנים ובנות׃

ויחי שרוג שלשים שנה ויולד את נחור׃