פסוקים על Creeping Things

כל שרץ העוף ההלך על ארבע שקץ הוא לכם׃

אך את זה תאכלו מכל שרץ העוף ההלך על ארבע אשר לא כרעים ממעל לרגליו לנתר בהן על הארץ׃

את אלה מהם תאכלו את הארבה למינו ואת הסלעם למינהו ואת החרגל למינהו ואת החגב למינהו׃

וכל שרץ העוף אשר לו ארבע רגלים שקץ הוא לכם׃

וזה לכם הטמא בשרץ השרץ על הארץ החלד והעכבר והצב למינהו׃

והאנקה והכח והלטאה והחמט והתנשמת׃

אלה הטמאים לכם בכל השרץ כל הנגע בהם במתם יטמא עד הערב׃

וכל אשר יפל עליו מהם במתם יטמא מכל כלי עץ או בגד או עור או שק כל כלי אשר יעשה מלאכה בהם במים יובא וטמא עד הערב וטהר׃

וכל כלי חרש אשר יפל מהם אל תוכו כל אשר בתוכו יטמא ואתו תשברו׃

מכל האכל אשר יאכל אשר יבוא עליו מים יטמא וכל משקה אשר ישתה בכל כלי יטמא׃

וכל אשר יפל מנבלתם עליו יטמא תנור וכירים יתץ טמאים הם וטמאים יהיו לכם׃

אך מעין ובור מקוה מים יהיה טהור ונגע בנבלתם יטמא׃

וכי יפל מנבלתם על כל זרע זרוע אשר יזרע טהור הוא׃

וכי יתן מים על זרע ונפל מנבלתם עליו טמא הוא לכם׃

וכי ימות מן הבהמה אשר היא לכם לאכלה הנגע בנבלתה יטמא עד הערב׃

והאכל מנבלתה יכבס בגדיו וטמא עד הערב והנשא את נבלתה יכבס בגדיו וטמא עד הערב׃

וכל השרץ השרץ על הארץ שקץ הוא לא יאכל׃

כל הולך על גחון וכל הולך על ארבע עד כל מרבה רגלים לכל השרץ השרץ על הארץ לא תאכלום כי שקץ הם׃

אל תשקצו את נפשתיכם בכל השרץ השרץ ולא תטמאו בהם ונטמתם בם׃

כי אני יהוה אלהיכם והתקדשתם והייתם קדשים כי קדוש אני ולא תטמאו את נפשתיכם בכל השרץ הרמש על הארץ׃