God

כי שמרתי דרכי יהוה ולא רשעתי מאלהי׃

כי כל משפטיו לנגדי וחקתיו לא אסיר מני׃

ואהי תמים עמו ואשתמר מעוני׃

וישב יהוה לי כצדקי כבר ידי לנגד עיניו׃

עם חסיד תתחסד עם גבר תמים תתמם׃

עם נבר תתברר ועם עקש תתפתל׃

כי אתה עם עני תושיע ועינים רמות תשפיל׃

כי אתה תאיר נרי יהוה אלהי יגיה חשכי׃

כי בך ארץ גדוד ובאלהי אדלג שור׃

האל תמים דרכו אמרת יהוה צרופה מגן הוא לכל החסים בו׃

כי מי אלוה מבלעדי יהוה ומי צור זולתי אלהינו׃

האל המאזרני חיל ויתן תמים דרכי׃

ותתן לי מגן ישעך וימינך תסעדני וענותך תרבני׃

ותאזרני חיל למלחמה תכריע קמי תחתי׃

ישועו ואין מושיע על יהוה ולא ענם׃

תפלטני מריבי עם תשימני לראש גוים עם לא ידעתי יעבדוני׃

חי יהוה וברוך צורי וירום אלוהי ישעי׃

האל הנותן נקמות לי וידבר עמים תחתי׃

מפלטי מאיבי אף מן קמי תרוממני מאיש חמס תצילני׃

על כן אודך בגוים יהוה ולשמך אזמרה׃

מגדל ישועות מלכו ועשה חסד למשיחו לדוד ולזרעו עד עולם׃

¶ למנצח מזמור לדוד השמים מספרים כבוד אל ומעשה ידיו מגיד הרקיע׃

בכל הארץ יצא קום ובקצה תבל מליהם לשמש שם אהל בהם׃

תורת יהוה תמימה משיבת נפש עדות יהוה נאמנה מחכימת פתי׃

פקודי יהוה ישרים משמחי לב מצות יהוה ברה מאירת עינים׃