Aaron

דבר אל אהרן ואל בניו לאמר זאת תורת החטאת במקום אשר תשחט העלה תשחט החטאת לפני יהוה קדש קדשים הוא׃

וכל מנחה בלולה בשמן וחרבה לכל בני אהרן תהיה איש כאחיו׃

והקטיר הכהן את החלב המזבחה והיה החזה לאהרן ולבניו׃

המקריב את דם השלמים ואת החלב מבני אהרן לו תהיה שוק הימין למנה׃

כי את חזה התנופה ואת שוק התרומה לקחתי מאת בני ישראל מזבחי שלמיהם ואתן אתם לאהרן הכהן ולבניו לחק עולם מאת בני ישראל׃

זאת משחת אהרן ומשחת בניו מאשי יהוה ביום הקריב אתם לכהן ליהוה׃

קח את אהרן ואת בניו אתו ואת הבגדים ואת שמן המשחה ואת פר החטאת ואת שני האילים ואת סל המצות׃

ויקרב משה את אהרן ואת בניו וירחץ אתם במים׃

ויצק משמן המשחה על ראש אהרן וימשח אתו לקדשו׃

ויקרב משה את בני אהרן וילבשם כתנת ויחגר אתם אבנט ויחבש להם מגבעות כאשר צוה יהוה את משה׃

ויגש את פר החטאת ויסמך אהרן ובניו את ידיהם על ראש פר החטאת׃

ויקרב את איל העלה ויסמכו אהרן ובניו את ידיהם על ראש האיל׃

ויקרב את האיל השני איל המלאים ויסמכו אהרן ובניו את ידיהם על ראש האיל׃

וישחט ויקח משה מדמו ויתן על תנוך אזן אהרן הימנית ועל בהן ידו הימנית ועל בהן רגלו הימנית׃

ויקרב את בני אהרן ויתן משה מן הדם על תנוך אזנם הימנית ועל בהן ידם הימנית ועל בהן רגלם הימנית ויזרק משה את הדם על המזבח סביב׃

ויתן את הכל על כפי אהרן ועל כפי בניו וינף אתם תנופה לפני יהוה׃

ויקח משה משמן המשחה ומן הדם אשר על המזבח ויז על אהרן על בגדיו ועל בניו ועל בגדי בניו אתו ויקדש את אהרן את בגדיו ואת בניו ואת בגדי בניו אתו׃

ויאמר משה אל אהרן ואל בניו בשלו את הבשר פתח אהל מועד ושם תאכלו אתו ואת הלחם אשר בסל המלאים כאשר צויתי לאמר אהרן ובניו יאכלהו׃

ויעש אהרן ובניו את כל הדברים אשר צוה יהוה ביד משה׃

¶ ויהי ביום השמיני קרא משה לאהרן ולבניו ולזקני ישראל׃

ויאמר אל אהרן קח לך עגל בן בקר לחטאת ואיל לעלה תמימם והקרב לפני יהוה׃

ויאמר משה אל אהרן קרב אל המזבח ועשה את חטאתך ואת עלתך וכפר בעדך ובעד העם ועשה את קרבן העם וכפר בעדם כאשר צוה יהוה׃

ויקרב אהרן אל המזבח וישחט את עגל החטאת אשר לו׃

ויקרבו בני אהרן את הדם אליו ויטבל אצבעו בדם ויתן על קרנות המזבח ואת הדם יצק אל יסוד המזבח׃

וישחט את העלה וימצאו בני אהרן אליו את הדם ויזרקהו על המזבח סביב׃