עברית

תְהִלִּיםס״ו

קריאה לכל העמים לעבוד את האלוהים על נפלאותיו

א׳
למנצח שיר מזמור הריעו לאלהים כל הארץ׃
ב׳
זמרו כבוד שמו שימו כבוד תהלתו׃
ג׳
אמרו לאלהים מה נורא מעשיך ברב עזך יכחשו לך איביך׃
ד׳
כל הארץ ישתחוו לך ויזמרו לך יזמרו שמך סלה׃
ה׳
לכו וראו מפעלות אלהים נורא עלילה על בני אדם׃
ו׳
הפך ים ליבשה בנהר יעברו ברגל שם נשמחה בו׃
ז׳
משל בגבורתו עולם עיניו בגוים תצפינה הסוררים אל ירימו למו סלה׃

האלוהים בוחן ומושיע את עמו

ח׳
ברכו עמים אלהינו והשמיעו קול תהלתו׃
ט׳
השם נפשנו בחיים ולא נתן למוט רגלנו׃
י׳
כי בחנתנו אלהים צרפתנו כצרף כסף׃
י״א
הבאתנו במצודה שמת מועקה במתנינו׃
י״ב
הרכבת אנוש לראשנו באנו באש ובמים ותוציאנו לרויה׃

קיום נדרי תודה

י״ג
אבוא ביתך בעולות אשלם לך נדרי׃
י״ד
אשר פצו שפתי ודבר פי בצר לי׃
ט״ו
עלות מחים אעלה לך עם קטרת אילים אעשה בקר עם עתודים סלה׃

עדות אישית על תפילה שנענתה

ט״ז
לכו שמעו ואספרה כל יראי אלהים אשר עשה לנפשי׃
י״ז
אליו פי קראתי ורומם תחת לשוני׃
י״ח
און אם ראיתי בלבי לא ישמע אדני׃
י״ט
אכן שמע אלהים הקשיב בקול תפלתי׃
כ׳
ברוך אלהים אשר לא הסיר תפלתי וחסדו מאתי׃
Use ← → arrow keys to navigate
Settings

Reading Style

Typeface

Font Size 19px

Reading Width 45 chars

Options