תְהִלִּיםכ״ה

תפילה להדרכה ולהגנה

א׳
לדוד אליך יהוה נפשי אשא׃
ב׳
אלהי בך בטחתי אל אבושה אל יעלצו איבי לי׃
ג׳
גם כל קויך לא יבשו יבשו הבוגדים ריקם׃
ד׳
דרכיך יהוה הודיעני ארחותיך למדני׃
ה׳
הדריכני באמתך ולמדני כי אתה אלהי ישעי אותך קויתי כל היום׃
ו׳
זכר רחמיך יהוה וחסדיך כי מעולם המה׃
ז׳
חטאות נעורי ופשעי אל תזכר כחסדך זכר לי אתה למען טובך יהוה׃

טוב ה׳ מדריך את הענווים

ח׳
טוב וישר יהוה על כן יורה חטאים בדרך׃
ט׳
ידרך ענוים במשפט וילמד ענוים דרכו׃
י׳
כל ארחות יהוה חסד ואמת לנצרי בריתו ועדתיו׃
י״א
למען שמך יהוה וסלחת לעוני כי רב הוא׃

ברכות יראת ה׳

י״ב
מי זה האיש ירא יהוה יורנו בדרך יבחר׃
י״ג
נפשו בטוב תלין וזרעו יירש ארץ׃
י״ד
סוד יהוה ליראיו ובריתו להודיעם׃
ט״ו
עיני תמיד אל יהוה כי הוא יוציא מרשת רגלי׃

תחינה נרגשת להצלה

ט״ז
פנה אלי וחנני כי יחיד ועני אני׃
י״ז
צרות לבבי הרחיבו ממצוקותי הוציאני׃
י״ח
ראה עניי ועמלי ושא לכל חטאותי׃
י״ט
ראה אויבי כי רבו ושנאת חמס שנאוני׃
כ׳
שמרה נפשי והצילני אל אבוש כי חסיתי בך׃
כ״א
תם וישר יצרוני כי קויתיך׃
כ״ב
פדה אלהים את ישראל מכל צרותיו׃
Use ← → arrow keys to navigate
Settings

Reading Style

Typeface

Font Size 19px

Reading Width 45 chars

Options