הַבְּשׂוֹרָה הַקְּדוֹשָׁה עַל־פִּי מַתַּי י״ז:א׳-י״ט
א׳
¶ ומקץ ששת ימים לקח לו ישוע את פטרוס ואת יעקב ואת יוחנן אחיו ויעלם בדד על הר גבוה׃
ב׳
וישתנה לעיניהם ויזהירו פניו כשמש ובגדיו כאור הלבינו׃
ג׳
והנה נראו אליהם משה ואליהו מדברים אתו׃
ד׳
ויען פטרוס ויאמר אל ישוע אדני טוב היותנו פה אם תחפץ נעשה נא פה שלש סכות לך אחת ולמשה אחת ולאליהו אחת׃
ה׳
עודנו מדבר והנה ענן אור הצל עליהם והנה קול מתוך הענן אמר זה בני ידידי אשר רציתי בו אליו תשמעון׃
ו׳
ויהי כשמע התלמידים ויפלו על פניהם וייראו מאד׃
ז׳
ויגש ישוע ויגע בם ויאמר קומו ואל תיראו׃
ח׳
וישאו עיניהם ולא ראו איש בלתי את ישוע לבדו׃
ט׳
וברדתם מן ההר צוה ישוע אתם לאמר לא תגידו לאיש את דבר המראה עד אם קם בן האדם מעם המתים׃
י׳
וישאלהו תלמידיו לאמר למה זה אמרים הסופרים כי אליהו בוא יבוא בראשונה׃
י״א
ויען ישוע ויאמר אליהם הנה אליהו בא בראשונה והשיב את הכל׃
י״ב
אבל אמר אני לכם כי אליהו כבר בא ולא הכירהו ויעשו בו כרצונם וכן גם בן האדם יענה על ידם׃
י״ג
אז הבינו התלמידים כי על יוחנן המטביל דבר אליהם׃
י״ד
ויהי כבואם אל המון העם ויגש אליו איש ויכרע על ברכיו לנגדו׃
ט״ו
ויאמר אדני רחם נא על בני כי מכה ירח הוא וחליו רע כי פעמים רבות הוא נפל באש ופעמים רבות אל תוך המים׃
ט״ז
ואביא אתו אל תלמידיך ולא יכלו לרפא לו׃
י״ז
ויען ישוע ויאמר הוי דור בלתי מאמין ופתלתל עד מתי אהיה עמכם עד מתי אסבל אתכם הביאו אותו אלי הנה׃
י״ח
ויגער בו ישוע ויצא השד ממנו וירפא הנער מן השעה ההיא׃
י״ט
ויגשו התלמידים אל ישוע והוא לבדו ויאמרו מדוע אנחנו לא יכלנו לגרשו׃
Settings