TRV
סנט מארק י״ד:כ״ו-מ״ב
כ״ו
ואחרי גמרם את ההלל ויצאו אל הר הזיתים׃
כ״ז
ויאמר אליהם ישוע אתם כלכם תכשלו בי בלילה הזה כי כתוב אכה את הרעה ותפוצין הצאן׃
כ״ח
ואחרי קומי מן המתים אלך לפניכם הגלילה׃
כ״ט
ויאמר אליו פטרוס גם אם כלם יכשלו אני לא אכשל׃
ל׳
ויאמר אליו ישוע אמן אמר אני לך כי היום בלילה הזה בטרם יקרא התרנגול פעמים אתה תכחש בי שלש פעמים׃
ל״א
והוא התחזק ויוסף לדבר ויאמר גם כי יהיה עלי למות אתך כחש לא אכחש בך וכן אמרו גם כלם׃
ל״ב
ויבאו אל חצר גת שמני שמו ויאמר אל תלמידיו שבו לכם פה עד אשר אתפלל׃
ל״ג
ויקח אתו את פטרוס ואת יעקב ואת יוחנן ויחל להשמים ולמוג׃
ל״ד
ויאמר אליהם נפשי מרה לי עד מות עמדו פה ושקדו׃
ל״ה
ויעבר משם מעט והלאה ויפל ארצה ויתפלל אשר אם יוכל היות תעבר נא מעליו השעה הזאת׃
ל״ו
ויאמר אבא אבי הכל תוכל העבר נא מעלי את הכוס הזאת אך לא את אשר אני רוצה כי אם את אשר אתה׃
ל״ז
ויבא וימצאם ישנים ויאמר אל פטרוס שמעון התישן הכי לא יכלת לשקד שעה אחת׃
ל״ח
שקדו והתפללו פן תבאו לידי נסיון הן הרוח היא חפצה והבשר רפה׃
ל״ט
ויסף לסור ויתפלל באמרו עוד הפעם כדברים ההמה׃
מ׳
וישב וימצאם שנית ישנים כי עיניהם היו כבדות ולא ידעו מה יענהו׃
מ״א
ויבא פעם שלישית ויאמר אליהם מעתה נומו ונוחו רב לי כי באה השעה הנה בן האדם נמסר בידי חטאים׃
מ״ב
קומו ונלכה הנה המוסר אותי קרב׃
Settings