הבְּשׂוֹרָה הַקְּדוֹשָׁה עַל־פִּי לוּקָס ז׳:א׳-כ״ד
א׳
¶ ויהי אחרי כלותו לדבר את כל דבריו באזני העם ויבא אל כפר נחום׃
ב׳
ועבד לאחד משרי המאות חלה למות והוא יקר לו מאד׃
ג׳
וישמע את שמע ישוע וישלח אליו מזקני היהודים וישאל מאתו לבוא ולהושיע את עבדו׃
ד׳
ויבאו אל ישוע ויתחננו לו מאד ויאמרו ראוי הוא אשר תעשה בקשתו׃
ה׳
כי אהב עמנו הוא והוא בנה לנו את בית הכנסת׃
ו׳
וילך אתם ישוע ויהי כאשר קרב אל הבית וישלח אליו שר המאה על ידי רעיו לאמר לו בי אדני אל נא תטריח את עצמך כי אינני כדי שתבוא בצל קורתי׃
ז׳
ובעבור זאת גם את עצמי לא חשבתי ראוי לבוא אליך אך דבר נא דבר וירפא נערי׃
ח׳
כי גם אנכי איש נתון תחת השלטון יש תחת ידי אנשי צבא ואמרתי לזה לך והלך ולזה בוא ובא ולעבדי עשה זאת ועשה׃
ט׳
וישמע ישוע את דבריו ויתמה עליו ויפן ויאמר אל ההמון ההלך אחריו אמר אני לכם גם בישראל לא מצאתי אמונה גדולה כזאת׃
י׳
וישובו השלוחים אל הבית וימצאו את העבד החלה והוא נרפא׃
י״א
ויהי ממחרת וילך אל עיר ושמה נעים ורבים מתלמידיו הלכים אתו והמון עם רב׃
י״ב
הוא קרב אל שער העיר והנה מוציאים מת בן יחיד לאמו והיא אלמנה ועמה רבים מעם העיר׃
י״ג
וכראות אתה האדון נכמרו רחמיו עליה ויאמר לה אל תבכי׃
י״ד
ויגש ויגע בארון והנשאים עמדו ויאמר עלם אמר אני אליך קומה׃
ט״ו
ויתעודד המת ויחל לדבר ויתנהו לאמו׃
ט״ז
ותאחז כלם רעדה וישבחו את האלהים ויאמרו כי נביא גדול קם בקרבנו וכי פקד האלהים את עמו׃
י״ז
ויצא הדבר הזה בכל יהודה ובכל הככר׃
י״ח
ותלמידי יוחנן הגידו לו את כל אלה׃
י״ט
ויקרא אליו יוחנן שנים מתלמידיו וישלחם אל ישוע לאמר לו האתה הוא הבא אם נחכה לאחר׃
כ׳
ויבאו אליו האנשים ויאמרו יוחנן המטביל שלחנו אליך לאמר האתה הוא הבא אם נחכה לאחר׃
כ״א
בעת ההיא רפא רבים מחליים ומנגעים ומרוחות רעות ולעורים רבים נתן ראות עינים׃
כ״ב
ויען ישוע ויאמר להם לכו והגידו ליוחנן את אשר ראיתם ואשר שמעתם כי עורים ראים ופסחים מתהלכים ומצרעים מטהרים וחרשים שומעים ומתים קמים ועניים מתבשרים׃
כ״ג
ואשרי אשר לא יכשל בי׃
כ״ד
ויהי כאשר הלכו להם שלוחי יוחנן ויחל לדבר אל המון העם על אדות יוחנן ויאמר מה זה יצאתם המדברה לראות הקנה אשר ינוע ברוח׃
Settings