הבְּשׂוֹרָה הַקְּדוֹשָׁה עַל־פִּי לוּקָס י״ח:א׳-י״ד
א׳
¶ וגם משל דבר אליהם להתפלל תמיד ולא להתרפות׃
ב׳
ויאמר שופט היה בעיר אחת אשר לא ירא את האלהים ולא נשא פנים לאדם׃
ג׳
ואלמנה היתה בעיר ההיא ותבא אליו לאמר דינה את דיני ממריבי׃
ד׳
וימאן מיום אל יום ואחרי כן אמר בנפשו גם כי את האלהים אינני ירא ולאדם לא אשא פנים׃
ה׳
אעשה את דין האלמנה הזאת על הוגיעה אתי פן תבוא תמיד ותדכאני במלים׃
ו׳
ויאמר האדון שמעו את אשר אמר דין העולה׃
ז׳
והאלהים הלא הוא יעשה דין בחיריו הקראים אליו יומם ולילה גם כי יתמהמה להושיעם׃
ח׳
אני אמר לכם כי יעשה את דינם במהרה אך בן האדם בבאו הימצא אמונה בארץ׃
ט׳
ויוסף וישא משלו אל אנשים בטחים בנפשם כי צדיקים המה ואחרים נבזים בעיניהם ויאמר׃
י׳
שני אנשים עלו אל המקדש להתפלל האחד פרוש והאחד מוכס׃
י״א
ויתיצב הפרוש לבדו ויתפלל לאמר אלהים אודך כי אינני כאשר האדם הגזלים והעשקים והנאפים או גם כמכס הזה׃
י״ב
אני צם פעמים בשבוע אני מעשר את כל קניני׃
י״ג
והמוכס היה עמד מרחוק ולא אבה אף לשאת את עיניו לשמים כי אם תופף על לבו לאמר אלהים סלח לי החוטא׃
י״ד
אני אמר לכם כי ירד זה לביתו נצדק מזה כי כל המרים את נפשו ישפל ואשר ישפילה ירומם׃
נוסח המקרא: Hebrew Bible: the Masoretic text, unpointed (Old Testament); Franz Delitzsch's Hebrew translation (New Testament) · נחלת הכלל