TRV
יְשַׁעְיָהוּ כ״ב:א׳-י״א
א׳
¶ משא גיא חזיון מה לך אפוא כי עלית כלך לגגות׃
ב׳
תשאות מלאה עיר הומיה קריה עליזה חלליך לא חללי חרב ולא מתי מלחמה׃
ג׳
כל קציניך נדדו יחד מקשת אסרו כל נמצאיך אסרו יחדו מרחוק ברחו׃
ד׳
על כן אמרתי שעו מני אמרר בבכי אל תאיצו לנחמני על שד בת עמי׃
ה׳
כי יום מהומה ומבוסה ומבוכה לאדני יהוה צבאות בגיא חזיון מקרקר קר ושוע אל ההר׃
ו׳
ועילם נשא אשפה ברכב אדם פרשים וקיר ערה מגן׃
ז׳
ויהי מבחר עמקיך מלאו רכב והפרשים שת שתו השערה׃
ח׳
ויגל את מסך יהודה ותבט ביום ההוא אל נשק בית היער׃
ט׳
ואת בקיעי עיר דוד ראיתם כי רבו ותקבצו את מי הברכה התחתונה׃
י׳
ואת בתי ירושלם ספרתם ותתצו הבתים לבצר החומה׃
י״א
ומקוה עשיתם בין החמתים למי הברכה הישנה ולא הבטתם אל עשיה ויצרה מרחוק לא ראיתם׃
Settings