דְּבָרִים ה׳:ז׳-י״ד

ז׳

לא יהיה לך אלהים אחרים על פני׃

ח׳

לא תעשה לך פסל כל תמונה אשר בשמים ממעל ואשר בארץ מתחת ואשר במים מתחת לארץ׃

ט׳

לא תשתחוה להם ולא תעבדם כי אנכי יהוה אלהיך אל קנא פקד עון אבות על בנים ועל שלשים ועל רבעים לשנאי׃

י׳

ועשה חסד לאלפים לאהבי ולשמרי מצותו׃

י״א

לא תשא את שם יהוה אלהיך לשוא כי לא ינקה יהוה את אשר ישא את שמו לשוא׃

י״ב

שמור את יום השבת לקדשו כאשר צוך יהוה אלהיך׃

י״ג

ששת ימים תעבד ועשית כל מלאכתך׃

י״ד

ויום השביעי שבת ליהוה אלהיך לא תעשה כל מלאכה אתה ובנך ובתך ועבדך ואמתך ושורך וחמרך וכל בהמתך וגרך אשר בשעריך למען ינוח עבדך ואמתך כמוך׃