דְּבָרִים ל״ד:ה׳-י״ב
ה׳
וימת שם משה עבד יהוה בארץ מואב על פי יהוה׃
ו׳
ויקבר אתו בגי בארץ מואב מול בית פעור ולא ידע איש את קברתו עד היום הזה׃
ז׳
ומשה בן מאה ועשרים שנה במתו לא כהתה עינו ולא נס לחה׃
ח׳
ויבכו בני ישראל את משה בערבת מואב שלשים יום ויתמו ימי בכי אבל משה׃
ט׳
ויהושע בן נון מלא רוח חכמה כי סמך משה את ידיו עליו וישמעו אליו בני ישראל ויעשו כאשר צוה יהוה את משה׃
י׳
ולא קם נביא עוד בישראל כמשה אשר ידעו יהוה פנים אל פנים׃
י״א
לכל האתות והמופתים אשר שלחו יהוה לעשות בארץ מצרים לפרעה ולכל עבדיו ולכל ארצו׃
י״ב
ולכל היד החזקה ולכל המורא הגדול אשר עשה משה לעיני כל ישראל׃
נוסח המקרא: Hebrew Bible: the Masoretic text, unpointed (Old Testament); Franz Delitzsch's Hebrew translation (New Testament) · נחלת הכלל