מַעֲשֵׂי הַשְּׁלִיחִים ד׳:א׳-י״א
א׳
¶ ויהי בדברם אל העם ויקומו עליהם הכהנים ונגיד בית המקדש והצדוקים׃
ב׳
כי חרה להם על אשר למדו את העם והגידו בישוע את תחית המתים׃
ג׳
וישלחו בהם את ידיהם וישימום במשמר עד למחר כי כבר בא הערב׃
ד׳
ורבים מהשמעים את הדבר האמינו ויהי מספר האנשים כחמשת אלפים׃
ה׳
ויהי ממחרת ויקהלו שריהם ראשיהם וזקניהם וסופריהם ירושלים׃
ו׳
וחנן הכהן הגדול וקיפא ויוחנן ואלכסנדרוס וכל אשר ממשפחת הכהן הגדול׃
ז׳
ויעמידו אתם בתוך וישאלום באי זה כח ובאי זה שם עשיתם זאת׃
ח׳
וימלא פטרוס רוח הקדש ויאמר אליהם אתם ראשי העם וזקני ישראל׃
ט׳
אם אנחנו נחקרים היום על הטובה אשר עשינו לאיש חולה ושאלתם במה זה נושע׃
י׳
יודע לכלכם ולכל עם ישראל כי בשם ישוע המשיח הנצרי אשר צלבתם אותו ואשר האלהים הקימו מן המתים כי בשמו עמד זה לפניכם בריא׃
י״א
והוא האבן אשר מאסתם אתם הבונים ותהי לראש פנה׃
נוסח המקרא: Hebrew Bible: the Masoretic text, unpointed (Old Testament); Franz Delitzsch's Hebrew translation (New Testament) · נחלת הכלל