פסוקים על Brick

13 פסוקים · 1 היבט

פסוקי מפתח

שְׁמֹות ה׳:ז׳
לא תאספון לתת תבן לעם ללבן הלבנים כתמול שלשם הם ילכו וקששו להם תבן׃
שְׁמֹות ה׳:ח׳
ואת מתכנת הלבנים אשר הם עשים תמול שלשם תשימו עליהם לא תגרעו ממנו כי נרפים הם על כן הם צעקים לאמר נלכה נזבחה לאלהינו׃
שְׁמֹות ה׳:ט׳
תכבד העבדה על האנשים ויעשו בה ואל ישעו בדברי שקר׃
שְׁמֹות ה׳:י׳
ויצאו נגשי העם ושטריו ויאמרו אל העם לאמר כה אמר פרעה אינני נתן לכם תבן׃
שְׁמֹות ה׳:י״א
אתם לכו קחו לכם תבן מאשר תמצאו כי אין נגרע מעבדתכם דבר׃
שְׁמֹות ה׳:י״ב
ויפץ העם בכל ארץ מצרים לקשש קש לתבן׃
שְׁמֹות ה׳:י״ג
והנגשים אצים לאמר כלו מעשיכם דבר יום ביומו כאשר בהיות התבן׃
שְׁמֹות ה׳:י״ד
ויכו שטרי בני ישראל אשר שמו עלהם נגשי פרעה לאמר מדוע לא כליתם חקכם ללבן כתמול שלשם גם תמול גם היום׃
שְׁמֹות ה׳:ט״ו
ויבאו שטרי בני ישראל ויצעקו אל פרעה לאמר למה תעשה כה לעבדיך׃
שְׁמֹות ה׳:ט״ז
תבן אין נתן לעבדיך ולבנים אמרים לנו עשו והנה עבדיך מכים וחטאת עמך׃
שְׁמֹות ה׳:י״ז
ויאמר נרפים אתם נרפים על כן אתם אמרים נלכה נזבחה ליהוה׃
שְׁמֹות ה׳:י״ח
ועתה לכו עבדו ותבן לא ינתן לכם ותכן לבנים תתנו׃
שְׁמֹות ה׳:י״ט
ויראו שטרי בני ישראל אתם ברע לאמר לא תגרעו מלבניכם דבר יום ביומו׃