תְהִלִּיםפ״ו

בקשה לחסד ולהגנה

א׳
תפלה לדוד הטה יהוה אזנך ענני כי עני ואביון אני׃
ב׳
שמרה נפשי כי חסיד אני הושע עבדך אתה אלהי הבוטח אליך׃
ג׳
חנני אדני כי אליך אקרא כל היום׃
ד׳
שמח נפש עבדך כי אליך אדני נפשי אשא׃

יסוד טובו של האלוהים

ה׳
כי אתה אדני טוב וסלח ורב חסד לכל קראיך׃
ו׳
האזינה יהוה תפלתי והקשיבה בקול תחנונותי׃
ז׳
ביום צרתי אקראך כי תענני׃

הוד מלכותו שאין דומה לו של יהוה

ח׳
אין כמוך באלהים אדני ואין כמעשיך׃
ט׳
כל גוים אשר עשית יבואו וישתחוו לפניך אדני ויכבדו לשמך׃
י׳
כי גדול אתה ועשה נפלאות אתה אלהים לבדך׃

תפילה להדרכה ולב מאוחד

י״א
הורני יהוה דרכך אהלך באמתך יחד לבבי ליראה שמך׃
י״ב
אודך אדני אלהי בכל לבבי ואכבדה שמך לעולם׃
י״ג
כי חסדך גדול עלי והצלת נפשי משאול תחתיה׃

הצלה מאויבים אלימים

י״ד
אלהים זדים קמו עלי ועדת עריצים בקשו נפשי ולא שמוך לנגדם׃
ט״ו
ואתה אדני אל רחום וחנון ארך אפים ורב חסד ואמת׃
ט״ז
פנה אלי וחנני תנה עזך לעבדך והושיעה לבן אמתך׃
י״ז
עשה עמי אות לטובה ויראו שנאי ויבשו כי אתה יהוה עזרתני ונחמתני׃
Use ← → arrow keys to navigate
Settings

Reading Style

Typeface

Font Size 19px

Reading Width 45 chars

Options