מִשְׁלֵי ג׳:י״ג-כ״ו

י״ג

אשרי אדם מצא חכמה ואדם יפיק תבונה׃

י״ד

כי טוב סחרה מסחר כסף ומחרוץ תבואתה׃

ט״ו

יקרה היא מפניים וכל חפציך לא ישוו בה׃

ט״ז

ארך ימים בימינה בשמאולה עשר וכבוד׃

י״ז

דרכיה דרכי נעם וכל נתיבותיה שלום׃

י״ח

עץ חיים היא למחזיקים בה ותמכיה מאשר׃

י״ט

יהוה בחכמה יסד ארץ כונן שמים בתבונה׃

כ׳

בדעתו תהומות נבקעו ושחקים ירעפו טל׃

כ״א

בני אל ילזו מעיניך נצר תשיה ומזמה׃

כ״ב

ויהיו חיים לנפשך וחן לגרגרתיך׃

כ״ג

אז תלך לבטח דרכך ורגלך לא תגוף׃

כ״ד

אם תשכב לא תפחד ושכבת וערבה שנתך׃

כ״ה

אל תירא מפחד פתאם ומשאת רשעים כי תבא׃

כ״ו

כי יהוה יהיה בכסלך ושמר רגלך מלכד׃