בְּמִדְבַּר ל״ה:י״א-כ״ב
י״א
והקריתם לכם ערים ערי מקלט תהיינה לכם ונס שמה רצח מכה נפש בשגגה׃
י״ב
והיו לכם הערים למקלט מגאל ולא ימות הרצח עד עמדו לפני העדה למשפט׃
י״ג
והערים אשר תתנו שש ערי מקלט תהיינה לכם׃
י״ד
את שלש הערים תתנו מעבר לירדן ואת שלש הערים תתנו בארץ כנען ערי מקלט תהיינה׃
ט״ו
לבני ישראל ולגר ולתושב בתוכם תהיינה שש הערים האלה למקלט לנוס שמה כל מכה נפש בשגגה׃
ט״ז
ואם בכלי ברזל הכהו וימת רצח הוא מות יומת הרצח׃
י״ז
ואם באבן יד אשר ימות בה הכהו וימת רצח הוא מות יומת הרצח׃
י״ח
או בכלי עץ יד אשר ימות בו הכהו וימת רצח הוא מות יומת הרצח׃
י״ט
גאל הדם הוא ימית את הרצח בפגעו בו הוא ימיתנו׃
כ׳
ואם בשנאה יהדפנו או השליך עליו בצדיה וימת׃
כ״א
או באיבה הכהו בידו וימת מות יומת המכה רצח הוא גאל הדם ימית את הרצח בפגעו בו׃
כ״ב
ואם בפתע בלא איבה הדפו או השליך עליו כל כלי בלא צדיה׃
נוסח המקרא: Hebrew Bible: the Masoretic text, unpointed (Old Testament); Franz Delitzsch's Hebrew translation (New Testament) · נחלת הכלל