TRV
סנט מארק י׳:י״ז-כ״ז
י״ז
ויהי בצאתו לדרך והנה איש רץ אליו ויכרע לפניו וישאל אותו רבי הטוב מה אעשה ואירש חיי עולם׃
י״ח
ויאמר לו ישוע מדוע קראת לי טוב אין טוב בלתי אחד האלהים׃
י״ט
הן ידעת את המצות לא תנאף לא תרצח לא תגנב לא תענה עד שקר לא תעשק כבד את אביך ואת אמך׃
כ׳
ויען ויאמר אליו רבי את כל אלה שמרתי נעורי׃
כ״א
ויבט בו ישוע ויאהבהו ויאמר אליו אחת חסרת לך מכר את כל אשר לך ותן לעניים ויהי לך אוצר בשמים ובוא שא את הצלב ולך אחרי׃
כ״ב
ויצר לו על הדבר הזה ויעצב וילך לו כי הון רב היה לו׃
כ״ג
ויבט ישוע סביב ויאמר אל תלמידיו כמה יקשה לבעלי נכסים לבוא אל מלכות האלהים׃
כ״ד
ויבהלו התלמידים על דבריו ויסף ישוע ויען ויאמר להם בני מה קשה לבטחים על חילם לבוא אל מלכות האלהים׃
כ״ה
נקל לגמל לעבר בתוך נקב המחט מבוא עשיר אל מלכות האלהים׃
כ״ו
ויוסיפו עוד להשתומם ויאמרו איש אלם אחיו מי אפוא יוכל להושע׃
כ״ז
ויבט בם ישוע ויאמר מבני אדם תפלא זאת אך לא מאלהים כי מאלהים לא יפלא כל דבר׃
Settings