ברכותיו של מוסר אלוהי

אִיּוֹב ה׳:י״ז-כ״ז

י״ז

הנה אשרי אנוש יוכחנו אלוה ומוסר שדי אל תמאס׃

י״ח

כי הוא יכאיב ויחבש ימחץ וידו תרפינה׃

י״ט

בשש צרות יצילך ובשבע לא יגע בך רע׃

כ׳

ברעב פדך ממות ובמלחמה מידי חרב׃

כ״א

בשוט לשון תחבא ולא תירא משד כי יבוא׃

כ״ב

לשד ולכפן תשחק ומחית הארץ אל תירא׃

כ״ג

כי עם אבני השדה בריתך וחית השדה השלמה לך׃

כ״ד

וידעת כי שלום אהלך ופקדת נוך ולא תחטא׃

כ״ה

וידעת כי רב זרעך וצאצאיך כעשב הארץ׃

כ״ו

תבוא בכלח אלי קבר כעלות גדיש בעתו׃

כ״ז

הנה זאת חקרנוה כן היא שמענה ואתה דע לך׃