יִרְמְיָהוּ ל״ז:ו׳-ט״ו
ו׳
ויהי דבר יהוה אל ירמיהו הנביא לאמר׃
ז׳
כה אמר יהוה אלהי ישראל כה תאמרו אל מלך יהודה השלח אתכם אלי לדרשני הנה חיל פרעה היצא לכם לעזרה שב לארצו מצרים׃
ח׳
ושבו הכשדים ונלחמו על העיר הזאת ולכדה ושרפה באש׃
ט׳
כה אמר יהוה אל תשאו נפשתיכם לאמר הלך ילכו מעלינו הכשדים כי לא ילכו׃
י׳
כי אם הכיתם כל חיל כשדים הנלחמים אתכם ונשארו בם אנשים מדקרים איש באהלו יקומו ושרפו את העיר הזאת באש׃
י״א
והיה בהעלות חיל הכשדים מעל ירושלם מפני חיל פרעה׃
י״ב
ויצא ירמיהו מירושלם ללכת ארץ בנימן לחלק משם בתוך העם׃
י״ג
ויהי הוא בשער בנימן ושם בעל פקדת ושמו יראייה בן שלמיה בן חנניה ויתפש את ירמיהו הנביא לאמר אל הכשדים אתה נפל׃
י״ד
ויאמר ירמיהו שקר אינני נפל על הכשדים ולא שמע אליו ויתפש יראייה בירמיהו ויבאהו אל השרים׃
ט״ו
ויקצפו השרים על ירמיהו והכו אתו ונתנו אותו בית האסור בית יהונתן הספר כי אתו עשו לבית הכלא׃
נוסח המקרא: Hebrew Bible: the Masoretic text, unpointed (Old Testament); Franz Delitzsch's Hebrew translation (New Testament) · נחלת הכלל