שיר ההחלמה של חזקיהו

יְשַׁעְיָהוּ ל״ח:ט׳-כ׳

ט׳

מכתב לחזקיהו מלך יהודה בחלתו ויחי מחליו׃

י׳

אני אמרתי בדמי ימי אלכה בשערי שאול פקדתי יתר שנותי׃

י״א

אמרתי לא אראה יה יה בארץ החיים לא אביט אדם עוד עם יושבי חדל׃

י״ב

דורי נסע ונגלה מני כאהל רעי קפדתי כארג חיי מדלה יבצעני מיום עד לילה תשלימני׃

י״ג

שויתי עד בקר כארי כן ישבר כל עצמותי מיום עד לילה תשלימני׃

י״ד

כסוס עגור כן אצפצף אהגה כיונה דלו עיני למרום אדני עשקה לי ערבני׃

ט״ו

מה אדבר ואמר לי והוא עשה אדדה כל שנותי על מר נפשי׃

ט״ז

אדני עליהם יחיו ולכל בהן חיי רוחי ותחלימני והחיני׃

י״ז

הנה לשלום מר לי מר ואתה חשקת נפשי משחת בלי כי השלכת אחרי גוך כל חטאי׃

י״ח

כי לא שאול תודך מות יהללך לא ישברו יורדי בור אל אמתך׃

י״ט

חי חי הוא יודך כמוני היום אב לבנים יודיע אל אמתך׃

כ׳

יהוה להושיעני ונגנותי ננגן כל ימי חיינו על בית יהוה׃