יְשַׁעְיָהוּ כ״ד:י׳-כ״ג

י׳

נשברה קרית תהו סגר כל בית מבוא׃

י״א

צוחה על היין בחוצות ערבה כל שמחה גלה משוש הארץ׃

י״ב

נשאר בעיר שמה ושאיה יכת שער׃

י״ג

כי כה יהיה בקרב הארץ בתוך העמים כנקף זית כעוללת אם כלה בציר׃

י״ד

המה ישאו קולם ירנו בגאון יהוה צהלו מים׃

ט״ו

על כן בארים כבדו יהוה באיי הים שם יהוה אלהי ישראל׃

ט״ז

מכנף הארץ זמרת שמענו צבי לצדיק ואמר רזי לי רזי לי אוי לי בגדים בגדו ובגד בוגדים בגדו׃

י״ז

פחד ופחת ופח עליך יושב הארץ׃

י״ח

והיה הנס מקול הפחד יפל אל הפחת והעולה מתוך הפחת ילכד בפח כי ארבות ממרום נפתחו וירעשו מוסדי ארץ׃

י״ט

רעה התרעעה הארץ פור התפוררה ארץ מוט התמוטטה ארץ׃

כ׳

נוע תנוע ארץ כשכור והתנודדה כמלונה וכבד עליה פשעה ונפלה ולא תסיף קום׃

כ״א

והיה ביום ההוא יפקד יהוה על צבא המרום במרום ועל מלכי האדמה על האדמה׃

כ״ב

ואספו אספה אסיר על בור וסגרו על מסגר ומרב ימים יפקדו׃

כ״ג

וחפרה הלבנה ובושה החמה כי מלך יהוה צבאות בהר ציון ובירושלם ונגד זקניו כבוד׃

נוסח המקרא: Hebrew Bible: the Masoretic text, unpointed (Old Testament); Franz Delitzsch's Hebrew translation (New Testament) · נחלת הכלל