בְּרֵאשִׁית ו׳:ה׳-י״ג

ה׳

וירא יהוה כי רבה רעת האדם בארץ וכל יצר מחשבת לבו רק רע כל היום׃

ו׳

וינחם יהוה כי עשה את האדם בארץ ויתעצב אל לבו׃

ז׳

ויאמר יהוה אמחה את האדם אשר בראתי מעל פני האדמה מאדם עד בהמה עד רמש ועד עוף השמים כי נחמתי כי עשיתם׃

ח׳

ונח מצא חן בעיני יהוה׃

ט׳

אלה תולדת נח נח איש צדיק תמים היה בדרתיו את האלהים התהלך נח׃

י׳

ויולד נח שלשה בנים את שם את חם ואת יפת׃

י״א

ותשחת הארץ לפני האלהים ותמלא הארץ חמס׃

י״ב

וירא אלהים את הארץ והנה נשחתה כי השחית כל בשר את דרכו על הארץ׃

י״ג

ויאמר אלהים לנח קץ כל בשר בא לפני כי מלאה הארץ חמס מפניהם והנני משחיתם את הארץ׃