יְחֶזְקֵאל ל״ח:א׳-י׳

א׳

¶ ויהי דבר יהוה אלי לאמר׃

ב׳

בן אדם שים פניך אל גוג ארץ המגוג נשיא ראש משך ותבל והנבא עליו׃

ג׳

ואמרת כה אמר אדני יהוה הנני אליך גוג נשיא ראש משך ותבל׃

ד׳

ושובבתיך ונתתי חחים בלחייך והוצאתי אותך ואת כל חילך סוסים ופרשים לבשי מכלול כלם קהל רב צנה ומגן תפשי חרבות כלם׃

ה׳

פרס כוש ופוט אתם כלם מגן וכובע׃

ו׳

גמר וכל אגפיה בית תוגרמה ירכתי צפון ואת כל אגפיו עמים רבים אתך׃

ז׳

הכן והכן לך אתה וכל קהלך הנקהלים עליך והיית להם למשמר׃

ח׳

מימים רבים תפקד באחרית השנים תבוא אל ארץ משובבת מחרב מקבצת מעמים רבים על הרי ישראל אשר היו לחרבה תמיד והיא מעמים הוצאה וישבו לבטח כלם׃

ט׳

ועלית כשאה תבוא כענן לכסות הארץ תהיה אתה וכל אגפיך ועמים רבים אותך׃

י׳

כה אמר אדני יהוה והיה ביום ההוא יעלו דברים על לבבך וחשבת מחשבת רעה׃

נוסח המקרא: Hebrew Bible: the Masoretic text, unpointed (Old Testament); Franz Delitzsch's Hebrew translation (New Testament) · נחלת הכלל