עָמוֹס ז׳:א׳-ט׳

א׳

¶ כה הראני אדני יהוה והנה יוצר גבי בתחלת עלות הלקש והנה לקש אחר גזי המלך׃

ב׳

והיה אם כלה לאכול את עשב הארץ ואמר אדני יהוה סלח נא מי יקום יעקב כי קטן הוא׃

ג׳

נחם יהוה על זאת לא תהיה אמר יהוה׃

ד׳

כה הראני אדני יהוה והנה קרא לרב באש אדני יהוה ותאכל את תהום רבה ואכלה את החלק׃

ה׳

ואמר אדני יהוה חדל נא מי יקום יעקב כי קטן הוא׃

ו׳

נחם יהוה על זאת גם היא לא תהיה אמר אדני יהוה׃

ז׳

כה הראני והנה אדני נצב על חומת אנך ובידו אנך׃

ח׳

ויאמר יהוה אלי מה אתה ראה עמוס ואמר אנך ויאמר אדני הנני שם אנך בקרב עמי ישראל לא אוסיף עוד עבור לו׃

ט׳

ונשמו במות ישחק ומקדשי ישראל יחרבו וקמתי על בית ירבעם בחרב׃