פסוקים על Rain: Forty days of, at the time of the flood

כי לימים עוד שבעה אנכי ממטיר על הארץ ארבעים יום וארבעים לילה ומחיתי את כל היקום אשר עשיתי מעל פני האדמה׃

ויהי לשבעת הימים ומי המבול היו על הארץ׃

בשנת שש מאות שנה לחיי נח בחדש השני בשבעה עשר יום לחדש ביום הזה נבקעו כל מעינת תהום רבה וארבת השמים נפתחו׃

ויהי הגשם על הארץ ארבעים יום וארבעים לילה׃

ויהי המבול ארבעים יום על הארץ וירבו המים וישאו את התבה ותרם מעל הארץ׃

ויגברו המים וירבו מאד על הארץ ותלך התבה על פני המים׃

והמים גברו מאד מאד על הארץ ויכסו כל ההרים הגבהים אשר תחת כל השמים׃

חמש עשרה אמה מלמעלה גברו המים ויכסו ההרים׃

ויגוע כל בשר הרמש על הארץ בעוף ובבהמה ובחיה ובכל השרץ השרץ על הארץ וכל האדם׃

כל אשר נשמת רוח חיים באפיו מכל אשר בחרבה מתו׃

וימח את כל היקום אשר על פני האדמה מאדם עד בהמה עד רמש ועד עוף השמים וימחו מן הארץ וישאר אך נח ואשר אתו בתבה׃

ויגברו המים על הארץ חמשים ומאת יום׃