פסוקים על Confusion

¶ ויהי כל הארץ שפה אחת ודברים אחדים׃

ויהי בנסעם מקדם וימצאו בקעה בארץ שנער וישבו שם׃

ויאמרו איש אל רעהו הבה נלבנה לבנים ונשרפה לשרפה ותהי להם הלבנה לאבן והחמר היה להם לחמר׃

ויאמרו הבה נבנה לנו עיר ומגדל וראשו בשמים ונעשה לנו שם פן נפוץ על פני כל הארץ׃

וירד יהוה לראת את העיר ואת המגדל אשר בנו בני האדם׃

ויאמר יהוה הן עם אחד ושפה אחת לכלם וזה החלם לעשות ועתה לא יבצר מהם כל אשר יזמו לעשות׃

הבה נרדה ונבלה שם שפתם אשר לא ישמעו איש שפת רעהו׃

ויפץ יהוה אתם משם על פני כל הארץ ויחדלו לבנת העיר׃

על כן קרא שמה בבל כי שם בלל יהוה שפת כל הארץ ומשם הפיצם יהוה על פני כל הארץ׃